गायक रामकृष्ण ढकालको घरजग्गा लिलामीमा

काठमाडौं, १९ वैशाख –नेपाली सुगम संगीतका चर्चित गायक रामकृष्ण ढकालको घरजग्गा लिलामीमा परेको छ । ललितपुरको श्री लालिगुराँस बहुउद्देश्यीय सहकारी संस्थाबाट जग्गा धरौटीमा राखेर लिएको ऋण पटक–पटक ताकेता गर्दा समेत नतिरेपछि लिलामीमा परेको हो ।

सहकारीले बिहीबार एक राष्ट्रिय दैनिकमा निकालेको सुचना अनुसार ढकाल पत्नी निलम शाह ढकालको नाममा रहेको ललितपुर सैंबुस्थित जग्गा लिलामीमा परेको हो । सैवु गाविस–८ मा कित्ता नं. ३९२, ३९३ को ८७.४४, २००.७१ वर्गमिटर क्षेत्रफलमा फैलिएको जग्गामा घर समेत निर्माण गरिएको छ ।

 ढकालले समयमै कर्जा नतिरेको, ब्याज नतिरेको, र सुचना प्रकाशित गरेरै सुचना दिँदा पनि वास्ता नगरेको कारण ३५ दिने सुचना निकाल्दै आगामी जेष्ठ २३ गते ढकालको जग्गा लिलामी गर्न लागिएको सहकारीले जनाएको छ । पत्नी निलमले लिएको ऋणको जमानत गायक ढकाल बसेको ढकाल दम्पत्तीको तस्बीरसहित छापिएको सुचनामा उल्लेख छ ।