अपमान गरेको भन्दै कार्यक्रम बहिस्कार
रेखिराम राना पाल्पा १४ असार । जिल्लाका साना पाँच राजनीतिक दलले दलीय वर्गीकरण गरेर अपमान गरेको भन्दै कार्यक्रम बहिस्कार गरेका छन् ।शान्ति समिति इकाई फोरम काठमाडौँले शुक्रबार तानसेनमा गरेको द्वन्द्व समाधानमा राजनीतिक दल तथा नागरिक समाजको भूमिका विषयक गोष्ठी दलहरूले बहिस्कार गरेका हुन् । कार्यक्रम आयोजकले राजनीतिक दललाई वर्गीकरण गरी भेदभाव गरेको भन्दै नेकपा–माओपादी, राष्ट्रिय जनमोर्चा, राष्ट्रिय प्रजातन्त्र पार्टी, राष्ट्रिय जनमुक्ति पार्टी र नेकपा (एकीकृत)ले कार्यक्रम बहिस्कार गरेका हुन् ।
कार्यक्रम आयोजकको व्यवहारले राजनीतिक दललाई भेदभाव गरेर दलीय सम्बन्ध बिगार्ने र द्वन्द्व बढाउने पाँच राजनीतिक दलको ठहर छ । उनीहरूले प्रेस विज्ञप्ति जारी गर्दै आयोजकको निच प्रकारको व्यवहारप्रति आपत्ति समेत प्रकट गरेका छन् । आयोजकले साना दलको वर्गीकरण गर्ने अधिकार नभएको र भेदभाव पूर्ण व्यवहार प्रदर्शन गरेकाले कार्यक्रम बहिस्कार गरेको राप्रपा पाल्पाका अध्यक्ष डुलबहादुर कुँवरले बताउनुभयो । शान्ति इकाई समितिका कार्यक्रमका कोर्डिनेटर धु्रव वाग्लेले भने दलको वर्गीकरण गर्ने प्रक्रिया सही भएको भन्दै आवेगमा बहिस्कार गरेको बताउनुभयो । उहाँले निर्वाचन सफल बनाउन र शान्तिपूर्ण समाज निर्माण गर्न सबै पक्षको सहभागिता जरुरी रहेको बताउँदै प्रतिनिधि धेरै थोरैले कार्यक्रम नै बहिस्कार गर्न नहुने बताउनुभयो । तर नेकपा–माओवादी पाल्पाकी प्रतिनिधि पार्वती विश्वकर्माले भने ठूला साना दलको भागवण्डा गर्ने अधिकार आयोजकलाई नभएको बताउनुभयो ।
सानो ठूलो दलको वर्गीकरण गर्ने अधिकार कुनैपनि संस्थालाई छैन राष्ट्रिय जनमोर्चा पाल्पाका सचिव विशाल दर्लामीले भन्नुभयो एनजिओ आइएनजिओले जनताको प्रतिनिधि नभएको बेलामा हैसियत मापन गर्ने होइन । कार्यक्रममा एमाओवादी, कांग्रेस र एमालेका तर्फबाट छ÷छ जना, नेकपा–माओवादीबाट चार, जनमोर्चाबाट दुई, राप्रपाबाट दुई, जनमुक्तिबाट २, र नेकपा एकीकृतबाट एक जना प्रतिनिधि बोलाइएको थियो । गोष्ठीमा एकीकृत नेकपा माओवादी, नेपाली कांग्रेस र नेकपा एमालेका प्रतिनिधि भने सहभागी भएका थिए ।
0 comments
तपाईंको प्रतिकृया