लुम्विनी अञ्चल स्तरीय सम्मेलनको तयारी

यज्ञमूर्ति तिमिल्सिना,  पाल्पा २६ जेठ ।  यही जेठ ३० र ३१ गते तानसेनमा हुन लागेको नेकपा एमाले निकट युवा संघ नेपालको प्रथम अञ्चल सम्मेलनको तयारी तीब्र रुपमा भईरहेको आयोजकले जानकारी दिएका छन् ।

 आज युवा संघ नेपालले तानसेनमा पत्रकार सम्मेलनको आयोजन गरि सम्मेलनको सफलताका लागि बिभिन्न उपसमिति मार्फत कामहरु तीब्र रुपमा भइरहेको जानकारी दिएको छ । पत्रकार सम्मेलनमा युवा संघका केन्द्रीय सदस्य एवम् लुम्विनी अञ्चल इन्चार्ज हिमाल श्रेष्ठले लुम्विनी अञ्चल भित्रका ६ जिल्लाका र आयोजक गरि २ सय ५ जना प्रतिनिधिहरुको सहभागिता रहने जानकारी दिनुभयो ।

 सम्मेलनको नेकपा एमालेका बरिष्ठ नेता एवम् पूर्वप्रधानमन्त्री माधव कुमार नेपालले उद्घाटन गर्ने कार्यक्रम रहेको जानकारी दिइयो । पत्रकार सम्मेलनका प्रमुख अतिथि नेकपा एमाले केन्द्रीय लेखा आयोगका सदस्य धनेन्द्रराज घिमिरेले सम्मेलनको सफलताका लागि लागिपर्न युवाहरुलाई आग्रह गर्नुभयो ।

कार्यक्रमको सञ्चालन युवा संघका केन्द्रीय सदस्य एवम् लुम्विनी अञ्चल सहइन्चार्ज सुरेन्द्र पाण्डेले गर्नुभएको थियो ।