एमालेले लगायो समानुपातिक सभासदको टुंगो

काठमाडौं १२ पुस, । नेकपा एमालेले संविधानसभामा जाने समानुपातिका तर्फका ८४ जना सभासदको टुंगो लगाएको छ । काठमाडौंको उत्तरी गोकर्ण रिर्सोट बसेको स्थायी समितिको आवासीय बैठकले समानुपातिक सभासदको टुंगो लगाएको हो ।
 एमाले स्रोतले दिएको जानकारी अनुसार एमाले सचिव युवराज ज्ञवाली, अनुशासन आयोगका अध्यक्ष अमृतकुमार बोहोरा, स्थायी समितिका सदस्य भरतमोहन अधिकारी, काशीनाथ अधिकारी, भानुभक्त ढकाल, केशव बडाल र पशुपति चौलागाईंलाई समानुपातिकबाट सभासद बनाइएको छ ।

बैठकले आदिवासी जनजातिहरुलाई पनि प्राथमिकतामा राख्दै समानुपातिकबाट सभासद बनाउने निर्णय गरेको छ । आदिवासी जनजातिबाट समानुपातिकमा सभासद हुनेहरुमा स्याङजाका गणेशमान गुरुङ, तुलबहादुर गुरुङ, इच्छाराज तामाङ, राजधानी दैनिकका संचालक महेन्द्र शेरचन, नरबहादुर थापा मगर, गोकुल घर्तीसहित लगायत रहेका छन ।

त्यसैगरी मधेसीबाट रामचन्द्र साह, सत्यनारायण मण्डल धर्मनाथ साह र रामअवतार पासवानलाई एमालेले सभासद बनाउने निर्णय गरेको छ । तीन दिनदेखि गोकर्ण रिसोर्टमा चलेको स्थायी समितिको बैठकले शुक्रबार साँझ समानुपातिकका सभासदको टुंगो लगाएको हो ।