मुख्य दलका नेताहरुले आज रेग्मीसँग छलफल गर्ने

९ फागुन, काठमाडौं । मुख्य दलका शीर्ष नेताहरुले प्रधानन्यायधीश खीलराज रेग्मीसँग आज छलफल गर्दैछन् । दलहरुले तयार पारेको नौं बुँदे मस्यौदाका केही बुँदामा असन्तुष्ट देखिएका रेग्मीसँग शीर्ष नेताहरुले छलफल गर्न लागेका हुन् । एकीकृत नेकपा माओवादी, नेपाली काँग्रेस, नेकपा एमाले र मधेसी मोर्चाका शीर्ष नेताहरुले आज साँझसम्ममा रेग्मीसँग छलफल गर्ने माओवादी अध्यक्ष प्रचण्डको निजी सचिवालयले जनाएको छ । हिजो प्रधानमन्त्री बाबुराम भट्टराईसँगको छलफलमा रेग्मीले उच्चस्तरीय राजनीतिक परामर्श समिति मातहत रहेर अन्तरिम चुनाबी मन्त्रिपरिषदले काम गर्नेलगायतका बुँदामा असन्तुष्टि जनाउनुभएको थियो । फोरम गणतान्त्रिकका नेता राजकिशोर यादवले प्रधानन्यायाधीश रेग्मीसँग शीर्ष नेताहरुले छलफल गरी सबै भ्रम र आशंका हटाउने जानकारी दिनुभएको छ ।